ក្រុម “ស្តេចស” Real Madrid បានដណ្តើមជ័យជម្នះដ៏មានតម្លៃ ១-០ លើក្រុម Benfica ដល់ទឹកដី Lisbon ដើម្បីក្ដាប់ប្រៀបក្នុងការប្រកួតជម្រើស Champions League វគ្គ Playoff ជើងទីមួយ។
រឿងរ៉ាវរើសអើងពូជសាសន៍ និងកាតក្រហម Mourinho
បន្ទាប់ពីស៊ុតបាល់កោងបញ្ចូលទីយ៉ាងស្អាតនៅនាទីទី ៥០ Vinicius Jr ហាក់ដូចជាមានជម្លោះជាមួយកីឡាករ Gianluca Prestianni។ ភ្លាមៗនោះ តារាប្រេស៊ីលរូបនេះបានប្តឹងទៅអាជ្ញាកណ្តាលជនជាតិបារាំង Francois Letexier ដែលបានសម្រេចចិត្តផ្អាកការប្រកួតជាង ១០ នាទី ដើម្បីអនុវត្ត “វិធានការប្រឆាំងការរើសអើងពូជសាសន៍” (Racism Protocol)។
នៅចុងម៉ោង គ្រូបង្វឹក Benfica លោក Jose Mourinho ត្រូវបានបណ្តេញចេញ (កាតក្រហម) ដោយសារការតវ៉ាខ្លាំងៗពេកដើម្បីទាមទារកាតលឿងទីពីរឱ្យ Vinicius។ នេះមានន័យថា លោកនឹងត្រូវខកខានដឹកនាំក្រុមក្នុងជើងទីពីរទល់នឹងអតីតក្រុមរបស់លោកនៅកីឡដ្ឋាន Santiago Bernabeu នៅសប្តាហ៍ក្រោយ។
សងសឹកបានសម្រេច
កូនក្រុមរបស់លោក Alvaro Arbeloa ទទួលបានជ័យជម្នះដ៏តានតឹងនៅកីឡដ្ឋាន Estadio da Luz ដើម្បីយកប្រៀបសម្រាប់ការប្រកួតបន្ទាប់ ព្រមទាំងបានសងសឹកចំពោះបរាជ័យ ៤-២ ក្រោមថ្វីជើង Benfica ក្នុងវគ្គចែកពូលកន្លងទៅ ដែលកាលនោះបានទាញទម្លាក់ម្ចាស់ជើងឯក ១៥ សម័យកាលឱ្យមកលេងវគ្គ Play-off នេះ។ លើកនេះ ក្រុម Real Madrid មើលទៅរឹងមាំជាងមុនឆ្ងាយណាស់។
ទម្រង់លេង និងគ្រាប់បាល់
Madrid ទទួលបានកម្លាំងបន្ថែមពីការវិលត្រឡប់របស់ Kylian Mbappe បន្ទាប់ពីសះស្បើយពីរបួសជង្គង់។ ចំណែក Vinicius ដែលកំពុងឡើងជើងខ្លាំងក្រោមការដឹកនាំរបស់លោក Arbeloa (ដែលជំនួស Xabi Alonso កាលពីខែមករា) បានស៊ុតបាល់បញ្ចូលទីយ៉ាងអស្ចារ្យ។
នៅនាទីទី ៥០ Vinicius បានស៊ុតបាល់កោងចូលជ្រុង៩ យ៉ាងស្អាត។ រូបគេទទួលបានកាតលឿងមួយដោយសារការរាំអបអរឌឺដងដាក់អ្នកគាំទ្រ Benfica។ ហេតុការណ៍នោះបានបង្កឱ្យមានជម្លោះជាមួយ Prestianni ដែលបានយកអាវខ្ទប់មាត់ ហើយ Vinicius បានអះអាងប្រាប់អាជ្ញាកណ្តាលថា គេត្រូវបានគូប្រកួតហៅថា “Mono” (ភាសាអេស្ប៉ាញមានន័យថា “ស្វា”)។
ការផ្អាកដ៏យូរដោយសារបញ្ហានេះ បានឈានដល់ការថែមម៉ោងរហូតដល់ ១២ នាទី ប៉ុន្តែ Benfica មិនអាចទាញយកផលចំណេញដើម្បីរកគ្រាប់បាល់តាមស្មើបានឡើយ ទោះបីជាអ្នកចាំទី Anatoliy Trubin បានព្យាយាមសង្គ្រោះបាល់ជាច្រើនលើកក៏ដោយ។ ក្រុមមកពីព័រទុយហ្គាល់មួយនេះ នឹងត្រូវប្រឈមមុខនឹងភារកិច្ចដ៏លំបាកនៅរដ្ឋធានីរបស់អេស្ប៉ាញនៅសប្តាហ៍ក្រោយ៕
