Girona វាយបកឈ្នះ Barca ២-១ យ៉ាងកក្រើក, Real Madrid ឡើងគ្រងកំពូលតារាង
ក្រុម “អធិរាជស” Real Madrid បានយកឈ្នះ Real Sociedad កាលពីថ្ងៃសៅរ៍ ដើម្បីវ៉ាដាច់ក្រុមអ្នកមានបុណ្យ Barcelona។ ចំណែកឯក្រុមរបស់លោក Hansi Flick មិនអាចយកឈ្នះ Girona ក្នុងជំនួប Derby ដ៏តានតឹងដើម្បីដណ្តើមកំពូលតារាងមកវិញឡើយ។ តារាវ័យក្មេង Lamine Yamal បានស៊ុតបាល់ពិន័យ ១១ ម៉ែត្រមិនចូល ខណៈដែល Barcelona បាននាំមុខមុនតាមរយៈខ្សែការពារ Pau Cubarsi នៅជិតចូលដល់ម៉ោងប្រកួត (នាទីទី ៦០)។
ទោះជាយ៉ាងណា គ្រាប់បាល់របស់ Thomas Lemar និង Fran Beltran បានជួយឱ្យ Girona ដែលកំពុងឈរនៅលេខ ១២ ធ្វើការវាយបកយកឈ្នះវិញ (Comeback) យ៉ាងអស្ចារ្យ។ ក្រុមទាំងពីរបានបើកការវាយសម្រុកដាក់គ្នាទៅវិញទៅមកក្នុងតង់ទីមួយ ប៉ុន្តែគួរឱ្យភ្ញាក់ផ្អើលដែលពួកគេបញ្ចប់តង់ដោយគ្មានគ្រាប់បាល់។ Raphinha បានស៊ុតមួយជើងខុសទីបន្តិច រីឯ Yamal បានស៊ុតទៅចំអ្នកចាំទី Girona គឺ Paulo Gazzaniga ពេលមានឱកាសដាច់មាត់។
នៅមួយផ្នែកទៀតនៃទីលាន ខ្សែប្រយុទ្ធអ៊ុយក្រែន Vladyslav Vanat បានបោះបង់ឱកាសល្អៗជាច្រើន។ Ferran Torres ស៊ុតខុសគោលដៅ ហើយ Raphinha ស៊ុតមួយជើងទៅបុកបង្គោលទី ខណៈដែលក្រុមរបស់លោក Flick ព្យាយាមរកគ្រាប់បាល់នាំមុខ។ ពួកគេគួរតែរកគ្រាប់បាល់បាននៅពេល Dani Olmo ត្រូវបាន Daley Blind បង្កកំហុសក្នុងប្រអប់គ្រោះថ្នាក់ ប៉ុន្តែ Yamal ស៊ុតបាល់ប៉េណាល់ទីទៅបុកបង្គោលទីទៅវិញ។
ទីបំផុត Barcelona រកបានគ្រាប់នាំមុខនៅនាទីទី ៥៩ តាមរយៈការតែតរបស់ Pau Cubarsi ពីការលើកបាល់របស់ Jules Kounde ប៉ុន្តែ Girona បានតាមស្មើវិញយ៉ាងឆាប់រហ័ស។ Thomas Lemar បានគេចផុតពី Eric Garcia ហើយបញ្ចប់ទីពីការបញ្ជូនរបស់ Vanat ពីចម្ងាយជិត។ គ្រាប់បាល់នេះបានធ្វើឱ្យសន្ទុះនៃការប្រកួតងាកទៅរក Girona ហើយ Barca ត្រូវពឹងផ្អែកលើការសង្គ្រោះបាល់ដ៏អស្ចារ្យរបស់អ្នកចាំទី Joan Garcia ដើម្បីទប់ទល់។
អ្នកចាំទីរូបនេះបានសង្គ្រោះបាល់ពីរដងជាប់គ្នាយ៉ាងអស្ចារ្យពីជើងរបស់ Ivan Martin និង Vanat ហើយបន្ទាប់មកបានយកជើងរារាំងបាល់របស់ Joel Roca ទៀត។ ទោះយ៉ាងណា Barca មិនអាចទប់ទល់នឹងការវាយសម្រុកបានឡើយ ហើយ Girona បានរកគ្រាប់នាំមុខនៅនាទីទី ៨៧ ដោយ Fran Beltran ស៊ុតពីគែមប្រអប់គ្រោះថ្នាក់។
ក្រុមភ្ញៀវដែលកាលពីសប្តាហ៍មុនបានប្តឹងទៅសហព័ន្ធបាល់ទាត់អេស្ប៉ាញរឿងអាជ្ញាកណ្តាល បានខឹងសម្បារយ៉ាងខ្លាំង ដោយសារ Kounde ត្រូវបានគេបង្កកំហុសមុនពេលមានគ្រាប់បាល់ ប៉ុន្តែអាជ្ញាកណ្តាលមិនពិន័យ។
Girona បានបញ្ចប់ការប្រកួតដោយសល់សមាជិក ១០ នាក់ នៅពេលដែល Roca ត្រូវបានបណ្តេញចេញក្រោយកាត់ជើង Yamal ក្នុងម៉ោងបន្ថែម។ ម្ចាស់ផ្ទះបានអបអរយ៉ាងសប្បាយរីករាយនៅកីឡដ្ឋាន Montilivi ខណៈលោក Flick បានទៅទាមទារការពន្យល់ពីអាជ្ញាកណ្តាល។
