ចប់ហើយ ! រាត្រីដ៏ខ្មៅងងឹត និងជាភាពអាម៉ាស់ជាប្រវត្តិសាស្ត្រប្រចាំក្លឹបតោខៀវ Chelsea បានកើតឡើងហើយនៅឯកីឡដ្ឋាន Stamford Bridge ក្រុមជើងឯកបារាំង Paris Saint-Germain បានបង្រៀនមេរៀនបាល់ទាត់ដ៏ឈឺចាប់បំផុតដល់ Chelsea ដោយយកឈ្នះជើងទីពីរ ៣-០ ដែលធ្វើឱ្យលទ្ធផលសរុបទាំងពីរជើង PSG លត់ Chelsea យ៉ាងចាស់ដៃដល់ទៅ ៨ ទល់នឹង ២ ក្នុងវគ្គ ១៦ ក្រុមចុងក្រោយនៃពានរង្វាន់ Champions League តើភាពវឹកវរ និងកំហឹងរបស់អ្នកគាំទ្រផ្ទុះឡើងកម្រិតណាទៅក្នុងយប់មិញនេះ ?
📝 មុនការប្រកួតជើងទីពីរនេះចាប់ផ្តើម Chelsea មានភារកិច្ចដ៏ធ្ងន់ធ្ងរ និងស្ទើរតែមិនអាចទៅរួចក្នុងការវាយបក បន្ទាប់ពីចាញ់ ៥-២ កាលពីជើងទីមួយ ។ ប៉ុន្តែ ក្តីសង្ឃឹមដ៏ស្តួចស្តើងនោះ ត្រូវបានបំផ្លាញចោលទាំងស្រុងត្រឹមតែ ១៤ នាទីដំបូងប៉ុណ្ណោះ! PSG បានវាយលុកយ៉ាងសាហាវ និងរកបាន ២ គ្រាប់យ៉ាងលឿននៅតំបន់ភាគខាងលិចទីក្រុងឡុងដ៍។ ចូលដល់តង់ទីពីរ គ្រាប់បាល់ទី ៣ របស់ PSG បានបន្ថែមការឈឺចាប់ ដែលធ្វើឱ្យ Chelsea របូតគ្រាប់បាល់សរុបដល់ទៅ ៨ គ្រាប់! នេះគឺជាចំនួនគ្រាប់បាល់ច្រើនបំផុតដែលពួកគេបានរបូត ក្នុងការប្រកួតវគ្គជម្រុះ Champions League ។ បរិយាកាសនៅក្នុងកីឡដ្ឋាន Stamford Bridge គឺពោរពេញទៅដោយភាពតានតឹង និងកំហឹង! វាមិនមែនជារឿងគួរឱ្យភ្ញាក់ផ្អើលទេ ដែលក្រុម Chelsea ត្រូវបានអ្នកគាំទ្ររបស់ខ្លួនស្រែកហ៊ោចំអក ដាក់ទាំងនៅពេលសម្រាកតង់ទីមួយ និងពេលបញ្ចប់ការប្រកួតពេញម៉ោង។ អ្វីដែលធ្វើឱ្យអ្នកគាំទ្រកាន់តែឆេះដុំនោះគឺ ការសម្រេចចិត្តរបស់អ្នកចាត់ការទូទៅលោក Liam Rosenior! នៅពេលដែលគាត់សម្រេចចិត្តប្តូរតារាឆ្នើមទាំង ៣ នាក់ចេញក្នុងតង់ទីពីរគឺ Cole Palmer, Joao Pedro និង Enzo Fernandez សំឡេងស្រែកហ៊ោរិះគន់ប្រឆាំងនឹងរូបគាត់បានបន្លឺឡើងពេញកីឡដ្ឋានតែម្តង ។
📝 ដូចពាក្យចាស់ពោលថា ‘ចាញ់ហើយ ថែមទាំងរបួសទៀត’! ការបរាជ័យដ៏ធ្ងន់ធ្ងរនេះ កាន់តែធ្លាក់ដុនដាបនៅចុងម៉ោង នៅពេលដែលខ្សែការពារ Trevoh Chalobah រងរបួសធ្ងន់រហូតត្រូវសែងចេញពីការប្រកួត។ ដោយសារតែលោក Liam Rosenior បានប្រើប្រាស់សិទ្ធិប្តូរកីឡាករអស់ទៅហើយនោះ Chelsea ត្រូវបង្ខំចិត្តលេងដោយមានសមាជិកត្រឹមតែ ១០ នាក់ប៉ុណ្ណោះ។ ងាកមកមើលក្រុម PSG វិញ ជ័យជម្នះដ៏ត្រចះត្រចង់នេះ បានបញ្ជូនពួកគេទៅកាន់វគ្គ ៨ ក្រុមចុងក្រោយ ដោយរង់ចាំជួបក្រុមខ្លាំង Liverpool ឬក៏ Galatasaray ។
👉 តើបងប្អូនអ្នកគាំទ្រតោខៀវយល់យ៉ាងណាដែរចំពោះទម្រង់លេងដ៏គួរឱ្យខកចិត្តមួយនេះ? តើការប្តូរកីឡាករសំខាន់ៗចេញជារឿងត្រឹមត្រូវដែរឬទេ? ហើយតើដល់ពេលដែលលោក Liam Rosenior ត្រូវវេចបង្វេចចាកចេញពី Stamford Bridge ហើយឬនៅ ?
