ក្រុមរបស់លោក Mikel Arteta បានតែតបញ្ចូលទីពីរគ្រាប់ពីការទាត់បាល់ជ្រុង និងរបូតមួយគ្រាប់វិញតាមរូបភាពដូចគ្នា ក្នុងការប្រកួតដែលបញ្ជាក់ពីសារៈសំខាន់កាន់តែខ្លាំងឡើងនៃការលេងបាល់ Set-pieces នៅក្នុងក្របខ័ណ្ឌ Premier League។
គ្រាប់បាល់ដំបូងរបស់ William Saliba ចាប់តាំងពីខែធ្នូ ឆ្នាំ២០២៤ បានជួយឱ្យ Arsenal នាំមុខនៅតង់ទីមួយនាកីឡដ្ឋាន Emirates។ ការតែតបញ្ចូលទីខ្លួនឯង (Own goal) របស់ Piero Hincapie បានជួយឱ្យ Chelsea តាមស្មើវិញពីការទាត់បាល់ជ្រុងដ៏គ្រោះថ្នាក់របស់ Reece James នៅមុនពេលបញ្ចប់តង់ទីមួយ។
+1
ប៉ុន្តែ Jurrien Timber បានជួយរក ៣ ពិន្ទុដ៏មានតម្លៃសម្រាប់ Arsenal តាមរយៈការតែតបញ្ចូលទីនៅតង់ទីពីរ មុនពេលខ្សែបម្រើស្លាបរបស់ Chelsea កីឡាករ Pedro Neto ត្រូវបានបណ្តេញចេញដោយសារទទួលបានកាតលឿងទីពីរ។
ជ័យជម្នះក្នុងលីគជាលើកទីពីរជាប់ៗគ្នារបស់ក្រុម “កាំភ្លើងធំ” បានជួយឱ្យពួកគេរក្សាការនាំមុខ ៥ ពិន្ទុដាច់ពីក្រុមលេខ ២ Manchester City ដែលនៅសល់មួយប្រកួតក្នុងដៃ ហើយទើបតែកាត់បន្ថយគម្លាតដោយយកឈ្នះ Leeds ១-០ កាលពីថ្ងៃសៅរ៍។
បន្ទាប់ពីរងការរិះគន់យ៉ាងចាស់ដៃពីផ្នត់គំនិត និងទម្រង់លេងមិនសូវបានល្អនាពេលថ្មីៗនេះ ដែលធ្វើឱ្យការប្រជែងពានរង្វាន់មានសង្ឃឹមឡើងវិញ Arsenal បានវិលត្រឡប់មករកភាពខ្លាំងរបស់ខ្លួនទាន់ពេលវេលា ដោយបានបន្តពីការលត់ Tottenham ៤-១ កាលពីចុងសប្តាហ៍មុន ជាមួយនឹងជ័យជម្នះដ៏តានតឹងមួយនេះ។
Arsenal នឹងត្រូវធ្វើដំណើរទៅកាន់ទឹកដី Brighton នៅថ្ងៃពុធ ដោយនៅសល់ ៩ ប្រកួតទៀតក្នុងគោលដៅឈ្នះជើងឯកលីគកំពូលអង់គ្លេសជាលើកដំបូងចាប់តាំងពីឆ្នាំ ២០០៤។ ក្រុម “កាំភ្លើងធំ” ដែលបានឡើងដល់វគ្គផ្តាច់ព្រ័ត្រ League Cup, វគ្គ ១៦ ក្រុមចុងក្រោយ Champions League និងជុំទី ៥ នៃពានរង្វាន់ FA Cup នៅសល់តែមួយប្រកួតគត់ដែលត្រូវប៉ះក្រុមក្នុងចំណាត់ថ្នាក់ Top 6 បច្ចុប្បន្ន នោះគឺការធ្វើដំណើរទៅកាន់ទឹកដី Manchester City ដែលអាចជាការប្រកួតកាត់សេចក្តីនៅថ្ងៃទី ១៨ ខែមេសា។
ចំណែកឯការខកខានឈ្នះ ៣ ប្រកួតជាប់ៗគ្នារបស់ Chelsea គឺជាការវាយប្រហារមួយដល់ក្តីសង្ឃឹមក្នុងការប្រជែងកៅអី Champions League រដូវកាលក្រោយ។ ពួកគេបានធ្លាក់មកចំណាត់ថ្នាក់លេខ ៦ បន្ទាប់ពីចាញ់ Arsenal ជាលើកទី ៣ ក្នុងរជ្ជកាលដឹកនាំដ៏ខ្លីរបស់លោក Liam Rosenior។
អ្នកចាំទី Robert Sanchez ស្ទើរតែជូនកាដូគ្រាប់បាល់ដំបូងដល់ Arsenal ទៅហើយ នៅពេលដែលអ្នកចាំទី Chelsea រូបនេះរអិលជើងក្រោមការដាក់សម្ពាធពី Viktor Gyokeres ប៉ុន្តែគេនៅតែអាចទាត់បាល់ចេញទាន់ពេលវេលាដើម្បីបញ្ចៀសគ្រោះថ្នាក់។
ការសាងស្នាដៃរបស់ Timber និងភាពប៉ិនប្រសប់ក្នុងការលេង Set-piece
នៅពេលដែល Sanchez បញ្ជូនបាល់ខុសដោយការទាត់ចេញទាំងភ័យខ្លាចម្តងទៀត លោក Rosenior បានយកដៃឱបក្បាលទាំងខកចិត្ត។ លោក Arteta បានទាញយកប្រយោជន៍ពីភាពខ្សោយនៅតំបន់ការពាររបស់ Chelsea ដើម្បីនាំមុខ តាមរយៈទម្រង់លេង Set-piece ដ៏ចំណានរបស់គ្រូបង្វឹកលោក Nicolas Jover នៅនាទីទី ២១។
Gabriel Magalhaes បានលោតតែតខ្ពស់ជាង Reece James និង Joao Pedro ពីការទាត់បាល់ជ្រុងរបស់ Bukayo Saka ទម្លាក់ចូលទៅក្នុងតំបន់ ៦ យ៉ាត ដែលទីនោះការតែតរបស់ Saliba បានរេផ្លាតបុកកីឡាករ Mamadou Sarr របស់ Chelsea ចូលទី។ គួរដឹងថា Chelsea របូតគ្រាប់បាល់ពី Set-pieces ចំនួន ៨ គ្រាប់ហើយ ក្នុងចំណោម ១៣ ប្រកួតដំបូងរបស់លោក Rosenior ហើយ ៤ គ្រាប់ក្នុងនោះគឺប៉ះជាមួយ Arsenal។
ប៉ុន្តែក្រុម “តោខៀវ” បានសងសឹកវិញនៅមុនពេលបញ្ចប់តង់ទីមួយ។ Arsenal ទទួលបានការព្រមានមួយនៅពេលដែលបាល់ជ្រុងរបស់ James បុកស្មារបស់ Declan Rice ដែលបង្ខំឱ្យ David Raya ជួយសង្គ្រោះយ៉ាងលំបាក។ ប៉ុន្តែពួកគេមិនបានរៀនសូត្រពីកំហុសនោះទេ ហើយពីការទាត់បាល់ជ្រុងបន្ទាប់ បាល់ទាត់កោងចូលរបស់ James ត្រូវបាន Hincapie តែតបញ្ចូលទីខ្លួនឯង។
Arsenal នៅតែមានភាពទន់ខ្សោយចំពោះការទាត់បាល់ជ្រុងរបស់ James ហើយ Joao Pedro គួរតែធ្វើបានល្អជាងការតែតចំពីមុខ Raya មុនពេលតែតខុសគោលដៅមួយគ្រាប់ទៀតពីការទាត់ Set-piece ដ៏គ្រោះថ្នាក់របស់ប្រធានក្រុម Chelsea រូបនេះ។
ការខកខានទាំងនោះបានក្លាយជាការខាតបង់យ៉ាងធំសម្រាប់ Chelsea ខណៈដែល Arsenal បានបង្ហាញពីភាពប៉ិនប្រសប់ក្នុងការលេង Set-piece របស់ពួកគេម្តងទៀតនៅនាទីទី ៦៦។ Timber បានរត់ចូលចំពេលយ៉ាងល្អឥតខ្ចោះដើម្បីតែតបញ្ចូលទីពីការទាត់បាល់ជ្រុងរបស់ Rice ខណៈដែលការតវ៉ាយ៉ាងខឹងសម្បាររបស់ Chelsea ទាមទារថាមានការធ្វើកំហុសលើ Sanchez មិនទទួលបានការផ្លាស់ប្តូរការសម្រេចចិត្តឡើយ។
វាគឺជាគ្រាប់បាល់ទី ១៦ ក្នុងលីគដែលរកបានពីការទាត់បាល់ជ្រុងដោយក្រុម “កាំភ្លើងធំ” ក្នុងរដូវកាលនេះ ហើយអ្នកគាំទ្រដ៏រីករាយរបស់ពួកគេបានអបអរសាទរដោយស្រែកច្រៀងថា “set-piece ទៀតហើយ, អូឡេ, អូឡេ” (set-piece again, ole, ole)។
Neto ដែលទទួលបានកាតលឿងពីការតវ៉ាក្រោយគ្រាប់បាល់របស់ Timber បានបង្ហាញការខកចិត្តរបស់ខ្លួនទៅលើ Gabriel Martinelli ដោយបានឆ្កឹះទម្លាក់ខ្សែបម្រើស្លាបរបស់ Arsenal រូបនេះ ដែលធ្វើឱ្យគេទទួលបានកាតក្រហមបណ្តេញចេញពីទីលាននៅនាទីទី ៧០។
ចុងក្រោយ Arsenal នៅតែត្រូវការការជួយសង្គ្រោះដ៏អស្ចារ្យនៅម៉ោងបន្ថែមពី Raya ដើម្បីបដិសេធការស៊ុតរបស់ Alejandro Garnacho មុនពេលពួកគេអាចអបអរសាទរជ័យជម្នះបានយ៉ាងរលូន។
