Arsenal លត់ Wigan យ៉ាងចាស់ដៃ ឡើងទៅវគ្គ ១៦ ក្រុម FA Cup ខណៈក្តីស្រមៃឈ្នះពាន ៤ កាន់តែច្បាស់
ក្រុម “កាំភ្លើងធំ” Arsenal របស់លោក Mikel Arteta បានលត់ក្រុមដែលកំពុងត្រដាបត្រដួសនៅលីគទី ៣ (League One) យ៉ាងចាស់ដៃ ដោយរកបានរហូតដល់ទៅ ៤ គ្រាប់ ក្នុងរយៈពេលត្រឹមតែ ២៧ នាទីដំបូងនៃការប្រកួត FA Cup ជុំទី ៤ នៅកីឡដ្ឋាន Emirates ។
Noni Madueke និង Gabriel Martinelli ជាអ្នកស៊ុតបាល់បញ្ចូលទីនាំមុខ មុនពេលខ្សែការពារ Jack Hunt ធ្វើឱ្យបាល់ចូលទីខ្លួនឯង (Own Goal) និងតាមពីក្រោយដោយគ្រាប់បាល់បិទគូទរបស់ Gabriel Jesus ។
ជ័យជម្នះនេះបានជួយឱ្យ Arsenal ឡើងទៅកាន់វគ្គ ១៦ ក្រុមចុងក្រោយជាលើកដំបូង ចាប់តាំងពីពួកគេឈ្នះពាន FA Cup ក្នុងឆ្នាំ ២០២០ ដែលជាពានរង្វាន់ធំតែមួយគត់ក្នុងសម័យកាលដឹកនាំរបស់លោក Arteta ។
បច្ចុប្បន្ន Arsenal កំពុងនាំមុខ ៤ ពិន្ទុនៅកំពូលតារាង Premier League, ឡើងដល់វគ្គផ្តាច់ព្រ័ត្រ League Cup ទល់នឹង Manchester City និងបានកៅអីនៅវគ្គ ១៦ ក្រុមចុងក្រោយនៃក្របខ័ណ្ឌ Champions League ផងដែរ។ នេះមានន័យថា Arsenal អាចនឹងបញ្ចប់ភាពរាំងស្ងួតពានរង្វាន់របស់ខ្លួន ជាមួយនឹងការឈ្នះពាន ៤ (Quadruple) ដ៏អស្ចារ្យនៅក្នុងរដូវកាលនេះ។
ការជួបគ្នារវាង Arsenal និង Wigan លើកនេះ មិនមានភាពតានតឹងដូចកាលពីឆ្នាំ ២០១៤ ឡើយ (កាលនោះ Arsenal ឈ្នះដោយបាល់ប៉េណាល់ទីកាត់សេចក្តី ដែល Arteta ជាអ្នកស៊ុតមួយគ្រាប់ដែរ)។ Wigan បច្ចុប្បន្ន កំពុងធ្លាក់ចុះយ៉ាងខ្លាំង ដោយស្ថិតនៅក្នុងតំបន់កាត់ចោលនៃ League One និងដឹកនាំដោយគ្រូបង្វឹកបណ្តោះអាសន្ន Glenn Whelan បន្ទាប់ពីលោក Ryan Lowe ត្រូវបានបណ្តេញចេញ។
មុនការប្រកួតចាប់ផ្តើម ខ្សែការពារ Riccardo Calafiori បានរងរបួសអំឡុងពេលកំដៅសាច់ដុំ ដែលបង្ខំឱ្យលោក Arteta ត្រូវដាក់ Bukayo Saka ចូលលេងវិញ ជំនួសឱ្យការគ្រោងទុកឱ្យសម្រាក។
ទោះបីជាមានការផ្លាស់ប្តូរកីឡាករភ្លាមៗក៏ដោយ Arsenal ចំណាយពេលតែ ១១ នាទីប៉ុណ្ណោះដើម្បីរកគ្រាប់បាល់នាំមុខ។ លោក Arteta បានផ្តល់ឱកាសឱ្យ Eberechi Eze ចូលលេងជម្រើសដំបូងម្តងទៀត បើទោះបីជាគេបង្ហាញទម្រង់លេងខកចិត្តក្នុងការប្រកួតស្មើ ១-១ ជាមួយ Brentford ក៏ដោយ។
Eze បានតបស្នងទំនុកចិត្តរបស់គ្រូបង្វឹកវិញ ដោយបានបង្វិលខ្លួនយ៉ាងឆ្លាតវៃ និងបញ្ជូនបាល់យ៉ាងល្អទៅឱ្យ Madueke អូសចូលតំបន់គ្រោះថ្នាក់របស់ Wigan ហើយបញ្ចប់ទីយ៉ាងល្អឥតខ្ចោះ។
Eze ដែលទើបផ្ទេរពី Crystal Palace កាលពីឆ្នាំមុន បានបង្កើតឱកាស (Assist) មួយគ្រាប់ទៀតនៅនាទីទី ១៨ ដោយបញ្ជូនបាល់យ៉ាងសុក្រឹតឱ្យ Martinelli ស៊ុតបញ្ចូលទីយ៉ាងត្រជាក់ចិត្តពីចម្ងាយ ១២ យ៉ាត។
គ្រាប់ទី ៣ របស់ Arsenal កើតឡើងនៅនាទីទី ២៣ នៅពេលដែលខ្សែការពារ Hunt របស់ Wigan តែតបាល់ដែល Saka លើកមក ចូលទីខ្លួនឯង។ ក្រុមរបស់លោក Arteta មិនបានបន្ធដៃឡើយ ដោយនៅនាទីទី ២៧ Christian Norgaard បានបញ្ជូនបាល់ឱ្យ Jesus ដាច់មាត់តែឯង ហើយលើកបាល់រំលងក្បាលអ្នកចាំទី Sam Tickle យ៉ាងស្អាត។
Arsenal នឹងបន្តបេសកកម្មដណ្តើមពាន Premier League លើកដំបូងចាប់តាំងពីឆ្នាំ ២០០៤ ដោយត្រូវធ្វើដំណើរទៅជួបក្រុមបាតតារាង Wolves នៅថ្ងៃពុធនេះ៕
